Presidenti i sapozgjedhur i SHBA-së, Donald Trump tha të shtunën se pritet ta zgjedhë Richard Grenell, ish-shefin e tij të inteligjencës, si të dërguar presidencial për misionet speciale, një post ku ai ka të ngjarë të drejtojë politika ndaj disa kundërshtarëve të SHBA, përfshirë Korenë e Veriut, shkruan Reuters.

“Grenell do të punojë në disa nga pikat më të nxehta në botë, duke përfshirë Venezuelën dhe Korenë e Veriut”, tha Trump në platformën e tij të mediave sociale “Truth”, pa përshkruar më tej detyrat.

Një burim i tranzicionit të Trump, tha për Reuters se Grenell do të fokusohet gjithashtu në tensionet në Ballkan, transmeton Telegrafi.

Grenell shërbeu si ambasador i Trump në Gjermani, një i dërguar i posaçëm presidencial për negociatat e paqes në Kosovë dhe Serbi, dhe si ushtrues detyre i drejtorit të inteligjencës kombëtare gjatë mandatit të Trumpit 2017-2021.

Pas fushatës për Trump përpara zgjedhjeve të 5 nëntorit, ai ishte një pretendent kryesor për Sekretarin e Shtetit, një detyrë që i shkoi senatorit amerikan Marco Rubio.

Ai konsiderohej gjithashtu si i dërguar i posaçëm për luftën në Ukrainë, e cila shkoi te gjenerallejtënant në pension Keith Kellogg.

Koreja e Veriut dhe Venezuela janë kundërshtarë të SHBA-së, edhe pse Reuters ka raportuar se Trump ka konsideruar ndjekjen e bisedimeve të drejtpërdrejta me udhëheqësin e Koresë së Veriut, Kim Jong Un, duke shpresuar të zvogëlojë rreziqet e konfliktit të armatosur.