Presidenti i sapo zgjedhur amerikan, Donald Trump, ka thënë sot se është duke planifikuar t’i dëbojë menjëherë dy deri në tre milionë emigrantë pa dokumente, dhe se do ta ndërtojë murin përgjatë kufirit amerikan me Meksikën.

Në një intervistë për emisionin “60 minuta” të televizionit amerikan CBS, e cila transmetohet sonte, e që është intervista e parë qëkur i fitoi zgjedhjet presidenciale në SHBA, Trump insistoi se do ta ndërtojë murin përgjatë kufirit amerikan me Meksikën.

“Ajo çfarë do të bëjmë është se do t’i dëbojmë njerëzit që janë kriminelë dhe kanë histori kriminale, grupet kriminale, shpërndarësit e drogës, mbase dy apo tre milionë prej tyre, nga vendi jonë,” ka thënë Trump.

Siç shkruan Express, ai po ashtu ka thënë se do të mbajë premtimin për dëbimin e mbi tre milionë njerëzve që sipas tij, jetojnë ilegalisht në Amerikë.

“Do t’i dëbojmë nga vendi, sepse ndodhen këtu ilegalisht”, ka deklaruar ai. /Insajderi.com