I nominuari republikan për president amerikan, Donald Trump, i ka kritikuar mediet, marrëveshjet tregtare dhe numrin në rritje të femrave që e akuzuan atë për keqtrajtim seksual.

Trump, mbrëmë gjatë një fushate në Pensilvani, i ka përsëritur ankesat e tij se zgjedhjet janë të manipuluara kundër tij dhe ka pretenduar se “mediet janë të korruptuara”.

Donald Trump, një biznesmen tejet i pasur, publikisht është akuzuar nga së paku 10 femra për sjellje të pahijshme. Mbrëmë Trump tha se këto femra janë gënjeshtare dhe ka shprehur përkushtim për t’i paditur ato, atëherë kur zgjedhjet të përfundojnë.

Sipas hulumtimeve të fundit të opinionit, Trump është prapa kandidates demokrate për presidente të Shteteve të Bashkuara, Hillary Clinton, megjithëqë sipas një hulumtimit të publikuar mbrëmë nga Reuters/Ipsos, diferenca është zvogëluar, shkruan rel.

Zgjedhjet presidenciale amerikane mbahen më 8 nëntor.