Punëtorët çanë një shtresë të fundit, të hollë guri të enjten, duke hapur një tunel nëntokësor midis Austrisë dhe Italisë, i cili do të shndërrohet në një linjë hekurudhore me shpejtësi të lartë që do të lidhë veriun me jugun e Evropës.

Tuneli “Brenner Base”, që po prezantohet si lidhja më e gjatë nëntokësore hekurudhore në botë, është pjesë qendrore e nismës së Bashkimit Evropian për të zhvendosur transportin e mallrave nga rrugët në hekurudhë, me qëllim uljen e ndotjes dhe nxitjen e tregtisë ndërkufitare, raporton Reuters.

“Sot po hedhim së bashku një hap vendimtar për ndërtimin e një prej veprave më të mëdha infrastrukturore në të gjithë kontinentin,” tha Kryeministrja e Italisë, Giorgia Meloni, gjatë ceremonisë së çarjes së shkëmbit.

“Është një ditë historike … për Italinë, për Austrinë dhe për gjithë Evropën.”

Kjo do të jetë linja e parë hekurudhore e dedikuar që lidh drejtpërdrejt Austrinë dhe Italinë. Pritet të hapet në vitin 2032, rreth 16 vjet me vonesë nga afati fillestar, dhe do të kushtojë 8.5 miliardë euro (10 miliardë dollarë) – rreth 2.5 miliardë më shumë se buxheti i parashikuar, përcjell Insajderi.

Kur të përfundojë, tuneli do të shtrihet 55 km (34 milje), duke u zgjatur në 64 km me lidhjen ekzistuese nëntokësore drejt Innsbruck-ut. Ai do të shkurtojë kohën e udhëtimit nga Fortezza në Itali deri në Innsbruck në më pak se 25 minuta, nga 80 minuta që zgjat aktualisht.

Kalimi Brenner është një nga pikat më të ngarkuara malore të Evropës për transportin e mallrave. Çdo vit, më shumë se 2.5 milionë kamionë, 14 milionë automjete dhe 50 milionë ton mallra kalojnë nëpër këtë kalim alpin, duke rënduar komunitetet lokale.

Aktualisht, rreth 70% e trafikut trans-alpin të mallrave përmes Brenner-it zhvillohet me rrugë, ndërsa vetëm 30% me hekurudhë – balancë që synon të përmbyset nga ky tunel.

Megjithatë, ndikimi i pritshëm i kësaj lidhjeje së re mund të dëmtohet nga Gjermania, e cila përbën një pjesë të madhe të trafikut rrugor përmes Alpeve, por ende nuk e ka finalizuar ndërtimin e rrugëve kyçe të aksesit nga veriu për t’u lidhur me tunelin e Brenner-it. /Insajderi.org/

IN Promo Marketing

Suksesi i radhës për ‘R & Rukolli Group’: Pijet e reja depërtojnë në tregun gjerman

Intel dhe Nvidia sjellin bashkëpunimin historik: Procesorë Intel me grafikë RTX të integruar

Shërbimi i Telefonave në Zone Mobile: Tani më Lehtë, Më Shpejt dhe Më Lirë!