H.H, i cili po dyshohet për sulm ndaj ish- policit nga Peja, Ahmet Shabanaj ka folur për Gazetën Insajderi. Ai pretendon se ish-policin me të cilin kishte problem e ka nip, djal të motrës.

I kontaktuar nga Gazeta Insajderi, H.H pretendon se probleme me ish-policin Ahmet Shabanaj kishte tash e sa kohë.

Ai tha se policin Shabanaj e ka nip, dhe se i njëjti pasi kishte qenë i lidhur me ish-gruan e të dyshuarit për sulm, H.H e kishte provokuar në forma të ndryshme.

“U arrestova, iu tregova edhe policisë që më ka provokuar edhe duke hapur “Facebook” në emrin tim. Rastin që e kam me ish-gruan, ky ka qenë i lidhur me të. Nuk ka pas problem me polic por me djalë te motrës (djali i motrës prej babe). Ma ka lodh shpirtin. Inspektorati policorë nuk ka bë kurgjo, anipse i kam lajmëru. Si polic ka qenë i suspenduar” – tha ai.

Kujtojmë se, Ahmet Shabanaj ishte suspenduar në aksionin e marsit të vitit 2022, ku 48 policë dhe dy doganierë ishin arrestuar për krim të organizuar.

Pas përfundimit të procedurave policore, Prokurori i Shtetit ka urdhëruar që i dyshuari, H.H të hetohet në liri për veprën penale ‘Sulm’.