Të premten e kaluar Inspektorati Komunal i Mitrovicës së Veriut nën udhëheqjen e Lëvizjes Vetëvendosje zhvilloi inspektime në një ndërtesë nën pronë komunale, objekt ky që vijon të jetë i shfrytëzuar nga strukturat paralele serbe.

Lista Serbe u “alarmua” të premten e kaluar duke u shprehur se inspektorët kanë lajmëruar se “do të vinë prap të hënën” dhe se do të pasonte “dëbimi” i punëtorve serbë; dhe se po ashtu “rendin do ta kenë institucionet shëndetësore, shkollat, kolegjet…nën pretendimet për pronë komunale”.

Në një ndërtesë në lagjen multietnike të quajtur Mahalla e Boshnjakëve inspeksioni komunal u ka kërkuar dokumentacionin e nevojshëm që kanë për shfrytëzimin e atij objekti, i cili bie nën pronësi të Komunës së Mitrovicës së Veriut.

Inspektorati shkoi sërish; dhe në mungesë të atij dokumentacioni të shfrytëzimit të objektit i tha Nënkryetarit të Listës Serbe, Igor Simiq, se “deri të premten duhet të lirojnë ndërtesën”, e për më tepër, për shkak se aty punohet me sistem serb paralel, e ku funksionon edhe një degë e të ashtuquajturës “Zyrë për Kosovë dhe Metohi”, e cila në Beograd drejtohet nga Petar Petkoviq.

Kjo ndërtesë, aktualisht, mbetet e vetmja që përbrenda ka “organet shtetërore të Republikës së Serbisë”, siç thonë Lista Serbe.

“I bëjmë pyetje komunitetit ndërkombëtar nëse në këtë mënyrë po respektohet thirrja e tyre ndaj kryetarëve jolegjitimë që të kryejnë vetëm detyre administrative dhe të mos marrin vendime politike kundër qytetarëve të komunave tona”, shkroi Lista Serbe në një reagim.