Stafi dhe studentët e Universitetit të ashtuquajtur  “Universiteti i Prishtinës në Mitrovicë”, kanë kërkuar shkarkimin e drejtorit të Zyrës për Kosovë në Qeverinë e Serbinë, Marko Gjuriq, pasi ai propozoi që Qeveria e Serbisë duhet t\i mbyllë 10 fakultetet e këtij universiteti në Mitrovicë.

Lajmi është bërë i ditur nga “Danas” në Serbi sipas të cilës, punëtorët e Universitetit në Mitrovicë, e kanë pritur me zemërim propozimin e Gjurqit për shuarjen e degës së të ashtuquajturit Universiteti i Prishtinës në Mitrovicë dhe krijimin e një Universiteti tjetër.

“Ne kërkojmë që Gjuriq të shkarkohet për këtë propozim fyes dhe që i dërgon mesazh të keq serbëve në Kosovë. Gjithashtu kërkojmë tq shkarkohet për shkak se Gjuriq ka shkelur premtimin e Serbisë, se Kosova do të jetë gjithmonë Serbi”, thuhet në komunikatë.

Propozimi i tij është vlerësuar fyes dhe sipas një komunikate të dërguar nga Universiteti paralel i Prishtinës në Mitrovicë, një hap i tillë e heq nga Kosova edhe institucionin e fundit të Serbisë në Kosovë dhe i hap rrugë njohjes së shtetit të Kosovës.

“Zbatimi i një vendimi të tillë do të çojë në humbjen e vendeve të punës për qindra profesorë, studentë e punëtorë të tjerë”, thuhet në letrën e dërguar Qeverisë së Serbisë.

Në këtë letër kundërshtohet edhe arsyetimi i Gjuriq “se situata e tanishme në Universitet i dëmton interesat e nxënësve dhe sistemin e arsimit të lartë në Serbi”.

Sipas drejtuesve të Universitetit paralel, Ministria e Serbisë ka ri-akredituar këtë Universitet dhe kjo është arsye e mjaftueshme që ai të vazhdojë.