Këshilltari i ministrit të Bujqësisë, njëherësh edhe asamblist i Lëvizjes Vetëvendosje në Komunën e Prizrenit, Petrit Hoxhaj ka përkrahur sulmin fizik ndaj gazetarit Valon Syla.

Përmes një shkrimi në Facebook, Hoxhaj ka nënkuptuar se Syla e ka merituar sulmin fizik ndaj tij nga tre persona.

“Doren nzemer , Valon Syles shpesh ju kruhet. ( kjo eshte shpreja e lir e imja qe as kush nuk mundet te ma mohoj )”, ka shkruar këshilltari i ministrit Peci me plot gabime drejtshkrimore.

Pak minuta më vonë, këshilltari i ministrit Peci ka tentuar ta përmirësojë veten. Hoxhaj tha se duhet pasur kujdes “se kujt dëshiron t’i dërgosh mesazhe dhe se si i drejtohesh”.

“Jam kundër dhunës sepse dhuna nuk e përqon mesazhin e duhur, por duhet pas kujdes se kujt dëshiron t’i dërgosh mesazhe dhe se si i drejtohesh sidomos kur pretendon se e njeh nivelin e emancipimit edukativ e social të vendit. ***vëmendja është e shtrenjtë!!!”, ka shkruar Hoxhaj.

Gazetari Syla është sulmuar mbrëmë nga tre persona, ku ka pësuar lëndime të rënda në kokë dhe në dorën e majtë.

Ai dyshon se sulmi ka ndodhur për shkak të deklarimeve të tij lidhur me pasurinë e kryetarit të BIK-ut, Naim Tërnavës.