Një 33-vjeçar iranian ka vdekur dje (të mërkurën) në ambientet e Spitalit Amerikan 3, në Tiranë, ndërkohë që dyshohet se ai nuk ka marrë ndihmë mjekësore nga stafi i spitalit.
“Boldnews.al” ka mësuar se i riu është paraqitur në gjendje të rëndë shëndetësore dhe ka kërkuar ndihmën e specializuar mjekësore.
Një mjeke, e cila e ka parë në ambientet e Spitalit, ka njoftuar Shërbimin e Urgjencës, për të vlerësuar situatën dhe për t’i dhënë trajtimin e duhur.
Por, nga stafi i Urgjencës 33-vjeçari iranian është vlerësuar si një person nën efektin e alkolit dhe nuk i kanë dhënë asistencën e nevojshme.
Por, pak minuta më vonë ai ka ndërruar jetë në një prej dhomave, në katin e parë të godinës.
Trupi i pajetë është gjetur nga një prej sanitareve të Spitalit Amerikan 3. Ajo, e shokuar, ka njoftuar menjëherë stafin mjekësor.
Por ishte shumë vonë.
33-vjeçari është gjetur pa shenja jete, ndërkohë që kishte shkumëzuar nga goja.
Dyshimet paraprake janë se shtetasi iranian mund të ketë qenë nën efektin e narkotikëve.
Megjithatë, ai mund të ishte në jetë, në rast se stafi mjekësor i spitalit privat do të ishte përkushtuar për t’i dhënë ndihmën paraprake.
Deri më tani nuk ka asnjë të dhënë zyrtare mbi këtë ngjarje.
Ndërkohë, edhe nga Policia e Shtetit nuk është dhënë asnjë njoftim për episodin e rëndë të ndodhur në ambjentet e Spitalit Amerikan 3,“Boldnews.al”.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
