Vendet e QUINT-it presin që autoritetet kosovare të konsultohen me ta rreth ndërrimit të misionit të FSK-së. Sipas tyre, për Kosovën duhet të jetë prioritet ruajtja dhe zhvillimi i marrëdhënieve me partnerët ndërkombëtarë.

Vendet e QUINT-it, respektivisht përfaqësuesit e tyre, të cilët janë me mision në Kosovë, u kanë bërë thirrje autoriteteve kosovare që të mos rrezikojnë me veprime të njëanshme rreth krijimit të ushtrisë.

Sipas tyre, me këtë iniciativë Kosova do ta rrezikonte stabilitetin rajonal, por edhe marrëdhëniet me partnerët e saj ndërkombëtarë.

Përkundër këtij paralajmërimi, presidenti i vendit, Hashim Thaçi, dje i ka dërguar një letër NATO-s, duke e njoftuar për procesin e formimit të ushtrisë.

Thaçi u ka kërkuar miqësisht që t’i marrin në konsideratë të gjitha argumentet ligjore dhe politike të shpjeguara në letër, shkruan Zëri.

Ndërkohë dje Ministria e FSK-së ka njoftuar se ka proceduar në Qeveri projektligjin për krijimin e ushtrisë së Kosovës.

Sipas ministrit Demolli, ai ka dhënë mendim pozitiv për projektligjin për shndërrimin e FSK-së në ushtri të Kosovës, por ka shtuar se njëkohësisht ka dhënë edhe disa propozime që sipas tij duhet të merren parasysh edhe nga presidenti.