Vendimi i presidentit të Shteteve të Bashkuara të Amerikës, Donald Trump për tua ndaluar hyrjen refugjatëve sirianë, do tu kushtojë këtyre të fundit me jetë, ka thënë organizata humanitare “Mjekët Pa kufi”.

“Urdhri ekzekutiv i presidentit në mënyrë automatike do të bëjë që njerëzit të bllokohen në zonat e luftës dhe në mënyrë të drejtpërdrejtë ua rrezikon jetën”, thuhet në deklaratën për media të kësaj organizate.

“Mbyllja e dyerve nga SHBA, shtet i cili për vite të tëra ka ndihmuar refugjatët, është sulm mbi pranimin themelor të njerëzve mbi të drejtën për të ikur nga vendi me qëllim që të shpëtojnë jetën e tyre”, ka thënë drejtori i organizatës bamirëse, Jason Cone, transmeton Express.

Agjencia e Kombeve të Bashkuara për refugjatët, UNHC ka thënë se 4,9 milionë sirianë janë refugjatë në shtetet fqinje, teksa pothuajse një milion kanë ikur në Evropë dhe mbi 6 milionë janë të zhvendosur brenda Sirisë.

Ish-presidenti amerikan, Barack Obama kishte pranuar 25 mijë refugjatë sirianë në SHBA, përmes një programi për zhvendosje të refugjatëve të UNHCR. /Insajderi.com