Veton Nurkollari, ish drejtori i festivalit “DokuFest” në Prizren, do të jetë sivjet një prej anëtarëve të jurisë në Festivalin më të madh të dokumentarit në Rumani, “Astra Film Festival”.

Ky festival ka filluar mbrëmë me premierën e “Sieranevada” nga regjisori rumun Cristi Puiu, i cili është edhe filmi i nominuar nga Rumania për kategorinë e filmit më të mirë në gjuhë të huaj në ceremoninë Oscars 2017.

Pos Puiu dhe Nurkollarit, emra të tjerë si kritikja e filmit Claire Aguilar, Martichka Bozhilova – Drejtoreshë e Qendrës Evropiane për Dokumentarë apo Vlad Petri – regjisor, janë pjesë e jurisë së këtij festivali që do të zgjasë deri me 23 tetor, shkruan Kult Plus.

Nurkollari është kurator i DokuPhoto, një ekspozitë e përvitshme brenda vetë Festivalit, i cili është ndër kryesorët në Ballkan. Ai është anëtar i bordit në Qendrën Evropiane për Dokumentar dhe një ndër përkrahësit e Albanian Cinema Project.