Rruga “Adem Jashari” në Prizren njihet që ka shumë argjendari.

Por të hënën, njëra nga to ishte cak i një grabitje.

Pa dëmtuar asgjë, vetëm duke këputur një kabllo u arrit të vidhen ari në vlerë të rreth 150 mijë eurosh.

Këtë rast Policia e Kosovës e ka cilësuar si vjedhje e rëndë e personat që kanë arritur të depërtojnë në argjendari akoma janë të paidentifikuar.

“Nga persona të panjohur është arritur që të depërtohet brenda pa dëmtuar hyrjen, pa kry ndonjë dëm tjetër, e vetmja gjë që është dëmtuar vërehet një kabëll ku hapet seti dhe nga ai set është arritur të tërheqë gjësendet me vlerë”, ka thënë zëdhënsi i Policisë për rajonin e Prizrenit, Vesel Gashi.

Zëdhënësi i Policisë për rajonin e Prizrenit, Vesel Gashi tha se Policia është duke punuar intensivisht në mënyrë që personat që kryen këtë akt të identifikohen e të arrestohen.

“Policia që nga momenti i pranimit të informatës kanë dal në vendin e ngjarjes për të marr të gjitha veprimet poashtu janë duke vepruar në mënyrë intensive në ndriçimin dhe zbardhjen e këtij rasti”, ka shtuar Gashi.

Pos kësaj argjendarie, edhe një tjetër u tentua të vidhet por aty nuk u arrit të merret asgjë dhe Policia e ka cilësuar si vjedhje në tentativë./rtvdukagjini