Presidenti i Serbisë, Aleksandar Vuçiq, ka akuzuar shtetet perëndimore për “heshtje të qëllimshme” ndaj situatës në veriun e Kosovës, pas mbylljes së disa institucioneve dhe objekteve që funksionojnë sipas sistemit serb.
Në një intervistë për televizionin publik të Serbisë, Vuçiq deklaroi se zhvillimet e fundit në veri janë të organizuara nga autoritetet në Prishtinë, ndërsa fajësoi komunitetin ndërkombëtar për mungesë reagimi.
Sipas tij, Perëndimi po mban qëndrim të heshtur me shpresën se “populli serb do të largohet nga tokat e tij në Kosovë”, duke e cilësuar këtë si pjesë të një strategjie të heshtur të spastrimit etnik.
Vuçiq tha se kjo situatë po shkakton edhe tensione tek disa aktorë ndërkombëtarë, gjë që, sipas tij, duhet të shfrytëzohet në aspektin politik kundër qeverisë së Kosovës.
“Ata po heshtin sepse shpresojnë që në heshtje, populli serb do të dëbohet nga tokat e tyre shekullore në Kosovë. Në të njëjtën kohë, kjo po shkakton ankth te disa aktorë politikë në Perëndim dhe Lindje, që është një nervozë shtesë për Kurtin, dhe këtë, në kuptimin politik, duhet ta shfrytëzojmë”, deklaroi ai.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
