Gjatë qëndrimit në Ohër të Maqedonisë së Veriut me rastin e samitit të radhës për Ballknin e Hapur, presidenti serb Aleksandar Vuçiq, ka pasur një moment interesant me një gazetar të Klan Maqedonia.

Gazetari, duke e pyetur Vuçiqin nëse Ballkani i Hapur është i plotë pa Republikën e Kosovës, ai përballet me një pyetje nga presidenti serb, të cilit duket se i bën përshtypje se si gazetari i referohet Kosovës.

“Nga cili medium jeni ju?”, pyet Vuçiq gazetarin shqiptar në komunikim serbisht.

Ai i përgjigjet: “Jam gazetar nga Klan Maqedonia”.

Vuçiq vazhdon, duke thënë se në Ballkanin e Hapur është i mirëseradhur çdokush, duke shtuar se Kosovës ai i referohet ndryshe dhe jo “Republika e Kosovës”.

“Sa i përket dëshirës të çdokujt tjetër për të hyrë në Ballkanin e Hapur… secili është i mirëseardhur. Ju e quani Republika e Kosovës, ne e quajmë ndryshe. Por këto janë çështje… dikush do të thoshte se ka vetëm një çështje…në rregull ka një dialog që merret me këtë punë…por nëse do të zgjidhësh çështje se a do të ketë më shumë miell për qytetarët ose rrymë atëherë kjo është çështje që i takon Ballkanit të Hapur”, shprehet Vuçiq.

Ndryshe, nismës për Ballkanin e Hapur sot i është bashkuar edhe Mali i Zi me kryeministrin Dritan Abazoviq. Mbetet vetëm Kosova nga 6 shtetet e Ballkanit Perëndimor, që refuzon t’i bashkohet kësaj iniciative, që promovohet kryesisht nga Presidenti serb Aleksandar Vuçiq dhe Kryeministri shqiptar Edi Rama.