Presidenti serb Aleksandar Vuçiq ka konfirmuar se do të udhëtojë të hënën në Bruksel, ku është planifikuar të takohet me kryeministrin e Kosovës Albin Kurti një ditë më vonë.

Ky duhet të jetë takimi i parë midis Kurtit dhe Vuçiqit.

“Unë do të shkoj të hënën në Bruksel, të martën është një dialog që është i rëndësishëm”, ka thënë Vuçiq.

Ai ka pretenduar se nuk i intereson se çfarë thonë të tjerët dhe se dialogu është i rëndësishëm dhe është me rëndësi “të flasim për shkak të njerëzve në Kosovë”.

Vuçiq ka thënë se “rezultati shihet në fund të ndeshjes”.

“Unë gjithmonë i kam admiruar ata që para ndeshjes kërcënojnë se si do ta mundin kundërshtarin, nuk më intereson se çfarë thonë ata, vetëm mund të them se nëse mendoni të vini për gjërat për të cilat po flisni, më mirë mos ejani. Ne nuk ju lejojmë fuqive të mëdha të përzihen, e le më atyre. Ne do të kujdesemi për interesat tona.  Nuk do të jetë lehtë në Bruksel, ata vijnë për të shfaqur një shou, rezultati shkruhet në tabelë në fund e jo në fillim. Serbia është në rrugën evropiane dhe është shumë më afër sesa ata që dëshirojnë të japin leksione”, ka pretenduar Vuçiq./Insajderi.org.