Frashër Krasniqi sekretari për Media dhe Komunikim i Lëvizjes Vetëvendosje, duke folur për deklaratat e nënpresidentit amerikan Joe Biden për marrëveshjen e Demarkacionit dhe Asociacionit, tha se ai që dëshiron që këto marrëveshje të kalojnë sa më parë është Thaçi, e jo Amerika.

“Edhe deklarata e Biden, nuk e minimizon faktin se këto dy procese janë të dëmshme për të ardhmen e Kosovës dhe qytetarëve. Ne mendojmë që Amerika e ndjek rrymën institucionale, Biden vjen, rri dy ditë, por pasojat mbetën këtu”, tha Krasniqi në Klan Kosova.

Krasniqi gjithashtu foli edhe për kërkesën e Biden për luftën kundër korrupsioni, duke thënë se “ është interesante se njëri nga njerëzit që është person kyç i krimit, është Thaçi me të cilin ishte në takim”.

“Është e padrejtë të kërkohet lufta ndaj korrupsionit prej njerëzve që e kanë krijuar dhe e mirëmbajnë korrupsionin. Nuk mund të luftohet me Thaçin e Veselin që qëndrojnë në kokën e krimit dhe kjo po dëshmohet edhe përmes skandaleve të fundit”, tha ai.

Krasniqi ka thënë se nuk u ka ngelur hatri pse Biden nuk u takua me opozitarët, pasi që ata e dinë se takime të tilla zhvillohen me përfaqësuesit e institucioneve. /Insajderi.com