Punonjësit e ambasadës izraelite të vrarë gjatë mbrëmjes së të enjtes në sulmin me armë në Washington ishin Yaron Lischinsky dhe Sarah Milgram, raporton Haaretz.
Të dy ishin çift dhe u qëlluan ndërsa po largoheshin nga një aktivitet i organizuar nga Komiteti Amerikan Hebraik (AJC) në muzeun hebraik të qytetit.
Ambasadori i Izraelit në SHBA, Yechiel Leiter, tha se Lischinsky kishte planifikuar t’i propozonte martesë Milgram javën e ardhshme.
Lischinsky punonte si asistent kërkimor për çështjet e Lindjes së Mesme dhe Afrikës së Veriut në departamentin politik të ambasadës.
Ai emigroi në Izrael nga Gjermania në moshën 16 vjeç dhe shkroi në profilin e tij në LinkedIn se ishte “krenar që e quante Jerusalemin dhe Nurembergun shtëpi”.
Lischinsky shkroi gjithashtu se besonte “në vizionin e Marrëveshjeve të Abrahamit dhe se zgjerimi i rrethit të paqes me fqinjët tanë arabë dhe ndjekja e bashkëpunimit është në interes të Izraelit dhe të rajonit”.
Sarah Milgram punonte në departamentin e diplomacisë publike të ambasadës. Ajo studioi marrëdhënie ndërkombëtare në Universitetin Amerikan në Washington dhe vazhdoi të studionte për master në burime natyrore dhe zhvillim të qëndrueshëm në Universitetin për Paqe në Kosta Rika.
Në profilin e saj në LinkedIn, ajo shkroi se ishte e interesuar në kryqëzimin e “ndërtimit të paqes, angazhimit fetar dhe punës mjedisore” dhe se ishte e përkushtuar për të nxitur mirëkuptimin midis popujve të ndryshëm dhe për të promovuar harmoninë ndërfetare.
“I gjithë stafi i ambasadës është zemërthyer dhe i shkatërruar”, shkruhej në një postim në llogarinë X të ambasadës së Izraelit në SHBA. “Një terrorist i qëlloi dhe i vrau ata ndërsa po largoheshin nga një aktivitet në Muzeun Hebraik të Kryeqytetit në Washington. Asnjë fjalë nuk mund të shprehë thellësinë e pikëllimit dhe tmerrit tonë për këtë humbje të tmerrshme”.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
