Në medie është raportuar se janë gjetur një pjesë e mostrave të ish-aktivistit të VV-së, Astrit Deharit, të cilat ishin zhdukur në dhjetor të vitit të kaluar.

Nëna e Astrit Deharit, Xhemilja për Gazetën Insajderi tha se mostrat i kishte pasur prokurori Afrim Shefkiu.

“Jo, s’na kanë lajmëru neve, prokurori i ka marrë, prokurori i ka kthy”, thotë Xhemile Dehari për Gazetën Insajderi e cila është e bindur se prokurori i rastit, Afrim Shefkiu i ka marrë dhe i ka kthyer sërish mostrat në IML.

Ajo tutje ka thënë se ende për rastin nuk janë njoftuar as nga Ministria e Drejtësisë, as nga Prokuroria e as nga Policia.

Insajderi ka provuar të kontaktojë disa herë prokurorin e rastit, Afrim Shefkiun, por i njëjti nuk ka kthyer përgjigje.

Përgjigje nuk ka kthyer as Ministria e Drejtësisë dhe Policia.