Lucas Paqueta, mesfushori sulmues brazilian i cili luan te ekipi anglez West Ham United, po hetohet nga Federata Angleze e Futbollit, për baste të dyshimta.

Sipas kësaj federate, për brazilianin janë vënë baste në katër raste për kartonë të verdhë. Qarkullimi i parave ka ardhur nga vendi i tij i origjinës, Brazili.

Ai rrezikon të skualifikohet përgjithmonë nga futbolli.

Sipas The Sun, në orët e fundit akuzës i është shtuar edhe akuza e re për “pengim të hetimeve” të lidhura me telefonin e tij.

FA pasi e analizoi, ia ktheu telefonin lojtarit, i cili, megjithatë, pasi e rimori, e hodhi pasi ndërkohë kishte blerë një të ri. Ditët e fundit, FA i kërkoi Paquetas që të kthente sërish pajisjen e vjetër për hetime të mëtejshme, por mori si përgjigje nga lojtari: “Nuk e kam më”. Kjo gjë u pa, pikërisht, si pengesë për hetimet.

Tani FA e akuzon Paquetan jo vetëm për baste të paligjshme, me rrethanë rënduese se ka vënë bast në ndeshjet e tij dhe për veten e tij, por edhe për mosbashkëpunim me drejtësinë në dy raste.

Siç raportohet nga Calcio&Finanza, seanca dëgjimore për procedimin kundër Paquetas është caktuar për në mars të ardhshëm, megjithëse një vendim mund të mos jepet para verës së vitit 2025.