Komiteti Teknik i Gjyqtarëve (CTA) në Spanjë e ka dënuar Gil Manzanon dhe ai nuk do të marrë pjesë në javën e 29-të të ndeshjeve në La Liga, kjo për shkak të gabimit që bëri në ndeshjen Valencia-Real Madrid rreth dy javë më parë.

Ani pse nga pikëpamja e Komitetit, Gil Manzano kishte performuar mirë në një ndeshje të tensionuar, ai bëri një gabim në aksionin e fundit të ndeshjes duke i dhënë fund asaj në momentin e gabuar.

40-vjeçari i fryu bilbilit në momentin kur ‘Los Blancos’ po finalizonin aksionin e tyre të fundit, aty ku Bellingham në lëvizjen e fundit shënoi gol, vetëm një gjysmë sekondi më vonë pasi gjyqtari i dha fund takimit.

Futbolli spanjoll ishte dëshmitar i gabimit të njëjtë edhe më herët

Ishte e pritshme që Manzano të dënohej, pasi edhe gjyqtari Ortiz Arias kishte bërë gabimin e njëjtë vitin e kaluar në ndeshjen Valladolid-Sevilla kur lojtari i Sevillës bëri një goditje të fuqishme jashtë zonës e cila përfundoi në rrjet, por nuk u pranua.

Në atë rast, goli nuk u dha për shkak se gjyqtari i kishte rënë bilbilit para se topi të kalonte vijën e portës. Gjyqtari nga Madridi nuk kishte ndarë drejtësinë për tri javë për shkak të dënimit të tij. Tani, mbetet të shihet se sa kohë do të jetë jashtë fushave Gil Manzano, pasi gabimi i tij ishte i njëjti.

Gil Manzano do të jetë jashtë listës edhe këtë javë, por pritet që të rikthehet së shpejti, ai madje është njëri ndër kandidatët kryesor për të përfaqësuar Spanjën në Kampionatin Evropian 2024.