Eli Feldstein, zëdhënës që punon në Zyrën e Kryeministrit, akuzohet për zbulimin e informacionit top-sekret me implikime të sigurisë kombëtare në mediat evropiane, sipas një vendimi të botuar të dielën në mbrëmje nga kreu i Gjykatës së Magjistraturës Rishon Lezion, Menahem Mizrahi.

Emrat e tre të dyshuarve të tjerë mbeten të fshehur nga gjykata, por ajo konfirmoi se ata ishin të lidhur me institucionin mbrojtës, raporton Times of Israel, përcjell Insajderi.

“Hetimi filloi pasi u ngritën dyshime të rëndësishme në Shin Bet dhe IDF – përfshirë si rezultat i publikimeve në media – se informacionet sekrete dhe të ndjeshme të inteligjencës u morën nga IDF dhe u publikuan në mënyrë të paligjshme, duke shkaktuar shqetësime për dëmtim serioz për sigurinë kombëtare dhe rrezik për burimet e informacionit”, theksoi gjykata.

“Si rezultat, mund të ishte bërë dëm në aftësinë e organeve të mbrojtjes për të arritur qëllimin e çlirimit të pengjeve [të mbajtur në Gaza]“.

Netanyahu kishte kërkuar të distancohej nga kjo çështje, pasi që pretendoi se askush nga zyra e tij nuk ishte arrestuar ose nuk ishte nën hetim dhe duke kundërshtuar kritikat. Kryeministri izraelit e kishte minimizuar këtë aferë.

Megjithatë, sipas shumë mediave, Feldstein ishte shpesh në orbitën e afërt të Netanyahut. Ai shihet përkrah Netanyahut në foto të ndryshme gjatë vitit të kaluar.

Rasti u bë publik për herë të parë të premten, katër ditë pasi Feldstein u arrestua në një bastisje të policisë herët në mëngjes. Atij i është caktuar masa e paraburgimit të paktën deri të martën, kur është caktuar një seancë tjetër. /Insajderi.org/