Presidenti i Ukrainës, Volodymyr Zelenskyy, tha se përdorimi i një rakete eksperimentale balistike nga Rusia përbënte “një përshkallëzim të qartë dhe të ashpër” në luftë dhe bëri thirrje për dënim të fortë nga mbarë bota, pasi NATO akuzoi presidentin rus Vladimir Putinin se kërkon të “terrorizojë” civilët dhe të frikësojë aleatët e Ukrainës.

Zëdhënësi i NATO-s Farah Dakhlallah tha: “Lëshimi i saj as nuk do të ndryshojë rrjedhën e konfliktit dhe as nuk do të pengojë aleatët e NATO-s të mbështesin Ukrainën.”

Në një deklaratë pas fjalimit të Vladimir Putin në lidhje me sulmin e së enjtes në një qendër ushtarake në qytetin e Dnipro, Zelenskyy tha se sulmi ishte “edhe më shumë provë se Rusia nuk ka interes për paqen”, duke shtuar se duhet presion, shkruan The Guardian.

“Rusia duhet të detyrohet në paqe të vërtetë, e cila mund të arrihet vetëm me forcë”.

Presidenti rus kërcënoi me sulme të mëtejshme, duke thënë se Moska “kishte të drejtë” të godiste vendet perëndimore që i dhanë Kievit armë të përdorura kundër objektivave ruse.

“Një konflikt rajonal në Ukrainë i provokuar më parë nga perëndimi ka marrë elementë të një karakteri global”, tha Putin në një fjalim drejtuar kombit të transmetuar nga televizioni shtetëror pas orës 20:00 në Moskë.

Parlamenti i Ukrainës thuhet se ka shtyrë një seancë të së premtes për shkak të “çështjeve të mundshme të sigurisë” pas sulmit, tha transmetuesi publik Suspilne, duke cituar burime.

Ai raportoi se ligjvënësve iu tha të mbanin familjet e tyre jashtë distriktit qeveritar të Kievit dhe citoi parlamentarët të thoshin se, për momentin, seanca e radhës nuk ishte caktuar deri në dhjetor.

Raketa e re balistike u quajt Oreshnik (lajthia), tha Putin, dhe lëshimi i saj “ishte një përgjigje ndaj planeve të SHBA-së për të prodhuar dhe vendosur raketa të ndërmjetme dhe me rreze të shkurtër”. Ai tha se Rusia do të “përgjigjet në mënyrë të vendosur dhe simetrike” në rast të një përshkallëzimi.