Deputeti i Lidhjes Demokratike të Kosovës, Armend Zemaj, ka thënë se vlerësimi i grevës së minatorëve si jo-ligjor nga menaxhmenti i bordit të Trepçës Sh.A është i njëjtë me atë të pushtetit të ish-Jugosllavisë.

Zemaj këtë e ka deklaruar në seancën e së enjtes në Kuvendin e Kosovës, duke kërkuar që të respektohet greva e minatorëve dhe të plotësohën kërkesat e tyre, shkruan Gazeta Insajderi.

“Pikërisht 34 vite më parë, ishte greva e Minatorëve. I kanë fëmijët minatorë ose janë në moshë të shtyer minatorë dhe detyrohen të futen në thellësi, në të njëjtin objekt. Por, pamjet janë të trishtueshme, sepse janë pamjet e njëjta. Ata që e kujtojnë 20-28 shkurtin 1989 janë pothuajse pamje të njëjta”, ka deklaruar ai.

“Por a din çka është indinjimi im personal. Është përgjigja e menaxhmentit. Kryesuesi i menaxhmentit thotë se kjo grevë është jo-ligjore. Është e njëjta përgjigje, edhe Serbia thoshte se është grevë jo-ligjore. Por e morën një përgjigje e cila e shpërndau Jugosllavinë hegjemoniste në atë kohë”, ka thënë më tej Zemaj.

“Mos shikoni vetëm pozita politike nepotiste, sepse edhe të emëruarit në bordin e Trepçës mund ta ketë fatin e njëjtë”. /Insajderi.org/