Kryeministri i Republikës së Kosovës, Isa Mustafa, priti të martën në takim senatorin e Shteteve të Bashkuara të Amerikës, Bob Corker, të cilin e njoftoi për zhvillimet e fundit në vend.

Edhe në këtë takim, Kryeministri Mustafa theksoi mirënjohjen qeverisë dhe të qytetarëve të Kosovës për përkrahjen e jashtëzakonshme që SHBA-të kanë dhënë dhe po vazhdojnë të japin për Kosovën, thuhet në një komunikatë për media dërguar nga Zyra e Kryeministrit.

“Qytetarët e Kosovës janë krenarë me miqësinë e shtetit të Kosovës me SHBA-të, pasi që Shtetet e Bashkuara të Amerikës mbesin miqtë dhe përkrahësit më të mëdhenj të Kosovës në botë”, tha kryeministri Mustafa, duke shprehur po ashtu përkushtimin e Qeverisë për thellimin e bashkëpunimit me SHBA-të si partneri kryesor strategjik i Kosovës, thuhet në komunikatë.

Në anën tjetër, sic thuhet në komunikatë, Senatori i SHBA-ve, Bob Corker, gjatë takimit, vlerësoi progresin që është arritur në Kosovë gjatë këtyre viteve./Insajderi