Presidentja e vendit, Vjosa Osmani e kryeministri, Albin Kurti nuk po tregojnë kulturë demokratike. Asnjëri prej tyre nuk ka uruar fituesit e zgjedhjeve lokale e as nuk kanë dhënë komentet e tyre për procesin zgjedhor, siç iu takon krerëve të shtetit.
Përkundër presidentes e kryeministrit ndryshe vepruan kandidatët që humbën. Fillimisht Arben Vitia i Vetëvendosjes në Prishtinë pranoi humbjen duke e uruar kryetarin e ri, Përparim Ramën e LDK-së për fitoren. Njësoj veprojë edhe Lutfi Haziri në Gjilan edhe ai uroi Alban Hyesnin e VV-së për fitoren.
Partia e Kurtit, në këto zgjedhje arriti të fitojë vetëm në katër komuna. Gjilanin, Podujevën, Kamenicën e Shtimën, por pësoi debakël në Prishtinë, Prizren e Gjakovë. Komuna këto që cilësohen si më të rëndësishme të Kosovës.
Në raundin e dytë në balotazh shkuan 21 komuna. Mbrëmë ka përfunduar raundi i dytë i zgjedhjeve lokale në vend. Pas shpalljes së rezultateve preliminare nga Komisioni Qendror i Zgjedhjeve, mësohet se kush janë partitë që kanë fituar më së shumti komuna.
Partia Demokratike e Kosovës ka fituar nëntë komuna.
Lista Serbe ka fituar nëntë komuna.
Lidhja Demokratike e Kosovës ka fituar shtatë komuna.
Aleanca për Ardhmërinë e Kosovës i ka fituar pesë komuna.
Lëvizja Vetëvendosje i ka fituar katër komuna.
Ndërkohë, nga OJQ të ndryshme është vlerësuar se procesi i votimit është zhvilluar në mënyrë të qetë. Bazuar në të dhënat e Komisionit Qendror të Zgjedhjeve rreth 37.85% e qytetarëve kanë marrë pjesë në këto zgjedhje./Insajderi.org
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
