Një shumë prej rreth 10 milionë euro të shtetit të destinuara për blerjen e produkteve për rezervat shtetërore, dyshohet se janë “zhdukur”. Gazeta Insajderi, merr vesh nga burime brenda ministrisë që drejtohet nga Rozeta Hajdari, se malli që është blerë për rezerva nuk ka arritur në Kosovë, ndërsa kompania nga e cila është blerë ky mall është “zhdukur”.
Lidhur me këtë raportimin ka reaguar Ministrja e Industrisë, Ndërmarrësisë dhe Tregtisë. Kanë mohuar se janë zhdukur rreth 10 milionë euro të shtetit të destinuara për blerjen e produkteve për rezervat shtetërore.
Nga kjo ministri janë shprehur se rezervat shtetërore janë siguruar sipas planifikimit të projektuar.
Reagimi i plotë nga MINT:
Ju njoftojmë se lidhur me artikullin e publikuar në portalin Isajderi, me titullin “Skandali i madh i ministres Rozeta Hajdari; Zhduken rreth 10 milion euro te destinuara për rezervat shtetërore”, njoftojmë opinionin publik se përmbajtja e këtij artikulli është e pavërtetë.
Ministria e Industrisë, Ndërmarrësisë dhe Tregtisë njofton opinionin e gjerë se rezervat shtetërore janë siguruar sipas planifikimit të projektuar.
Me planifikim nga MINT dhe financim nga buxheti kombëtar, janë siguruar furnizime me produktet esenciale të rezervës shtetërore në sasi të konsiderueshme gjatë vitit 2022.
Rezerva e shtuar gjatë fillim vitit 2022, veçse ka arritur në Kosove dhe është vendosur në lokacionet e aranzhuara për rezervën shtetërore.
Raportime të pavërteta si kjo janë të dëmshme për sigurinë publike, andaj Ministria e Industrisë Ndërrmarrësisë do të ndjekë rrugët ligjore.
Kujtojmë që para disa ditësh, ministrja Rozeta Hajdari, ka shkarkuar nga detyra sekretarin e Ministrisë së Industrisë, Ndërmarrësisë dhe Tregtisë, Irfan Lipovica.
Kjo ministri, nuk ka treguar arsyen e vërtetë të shkarkimit të Lipovicës, por Gazeta Insajderi merr vesh nga burime mirë të informuara se prapa kësaj qëndron një skandal i madh.
Dyshohet se zyrtarët e MINT-it kanë blerë grurin për rezervat shtetërore, e kanë paguar mallin që do të duhej të arrinte në Kosovës sipas marrëveshjes, por se një gjë e tillë nuk ka ndodhur. Malli dhe paratë janë zhdukur.
Sipas burimeve të Gazetës Insajderi, kompania me të cilën kanë bërë marrëveshje nuk është bërë e “gjallë” pasi i janë kaluar paratë në llogari. Dhe se askush më nuk është përgjigjur lidhur me këtë çështje.
Dëmi i shkaktuar nga ky skandal dyshohet se është rreth 10 milionë euro, shkruan Gazeta Insajderi.
Gazeta ka kërkuarn tash e disa ditë nga Ministria e Industrisë, Ndërmarrësisë dhe Tregtisë, të dijë arsyen e vërtetë të shkarkimit të Lipovicës, por ky insitucion ka ijoruar pyetjet e gazetës.
Po ashtu, u është dërguar kërkesë edhe për qasje në dokumenetet dhe faturat që dëshmojnë për blerjet që ishin të destinuara për rezervat shtetërore. Por, as për kërkesën nuk e kanë konfirmuar protokollimin.
Ministrja Hajdari, pasi ka shkarkuar Irfan Lipovicën, i cili po e ushtronte detyrën e sekretarit të MINT-it, ka emëruar si zëvendësues të tij, Arbër Gegajn.
Ministrja Hajdari, gjatë kësaj jave ka qenë për raportim në kuvend lidhur me rrezervat shtetërore. Raportimi i saj para komisionit për Ekonomi ka qenë i mbyllur për publikun. Nuk janë lejuar gazetarët që të marrin pjesë në këtë raportim, me arsyetimin se ka sekrete shtetërore.
Gazeta ka provuar të marrë përgjigje rreth këtij raportimi edhe nga deputetët që janë anëtar të komisionit por ata nuk janë përgjigjur.
Kujtojmë se Qeveria e Kosovës në një nga mbledhjet e saj kishte ndarë dhjetë milionë euro për rezervën shtetërore, që është në kuadër të MINT-it.
“Qeveria është duke u siguruar që të përkrah sektorin e bujqësisë si është më së miri e më sigurt. Kemi aplikuar në programin për bujqësi për grantin prej 20 milionë eurosh për fermerët e vegjël. Do të kemi së paku edhe 10 milionë euro për rezerva shtetërore, që mund të mbushen me prodhime vendore”, pati thënë Kurti. /GazetaInsajderi
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
