Ai u prezantua si simbol i suksesit dhe luksit, por SPAK zbuloi pas skenës një nga strukturat më të sofistikuara të pastrimit të parave dhe lidhjeve me trafik ndërkombëtar droge…

Ermir Ndreaj, emër që deri dje simbolizonte luksin urban të Tiranës, tashmë është kthyer në një nga figurat kyçe të hetimit të Prokurorisë së Posaçme kundër Korrupsionit dhe Krimit të Organizuar (SPAK). I arrestuar së bashku me vëllezërit Artur dhe Ervin Hoxhosmani në kuadër të një megaoperacioni, Ndreaj akuzohet si pjesë e një rrjeti të strukturuar kriminal që ka pastruar dhjetëra milionë euro të ardhura nga trafiku ndërkombëtar i kokainës.

Ndreaj nuk është një emër i panjohur në rrethin elitist të kryeqytetit. Me pseudonimin “Cinco”, ai ndërtoi markën e tij si pronar i restorantit luksoz “Cinco Cavalli” në Durrës dhe më pas, restorantin “Savoy Garden” në kompleksin Delijorgji në Tiranë. Pikërisht në këtë kompleks, SPAK dhe agjentët e Byrosë Kombëtare të Hetimit kryen një operacion të befasishëm natën e ndalimit të tij.

Në të njëjtin kompleks ndodhet edhe “Clinique Cinqo”, një klinikë estetike luksoze që menaxhohet nga partnerja e tij, Elira Ndreaj, një figurë publike që përmes medias glamuroze është paraqitur si personifikimi i klasit dhe suksesit në botën e kujdesit estetik. Por pas sipërfaqes së dizajnit modern dhe klientelës VIP, hetuesit dyshojnë për një laborator të sofistikuar pastrimi parash.

Sipas burimeve të hetimit, Elira Ndreaj ka administruar disa nga flukset financiare të Ndreajt, duke i kanalizuar përmes aktivitetit të saj ligjor dhe duke u përdorur si pikë fiktive të ardhurash për të mbuluar burimin kriminal të fondeve. Një pjesë e parave dyshohet se janë investuar në pajisje estetike të importuara me vlera shumë herë më të larta se realiteti dhe në apartamente në zonën e Astirit, Shkozës dhe Durrësit.

Përveç investimeve në kryeqytet, Ndreaj ishte shpesh pjesë e eventeve në Palasë dhe jugun e vendit, ku sipas SPAK, fshiheshin kontakte me të kërkuar të tjerë për trafik ndërkombëtar droge. Në sistemin e informimit financiar është dokumentuar një seri transfertash të parave jashtë sistemit bankar të tipit hawala, të cilat kanë ndihmuar në dërgimin dhe sjelljen e fondeve ndërmjet Shqipërisë, Italisë, Holandës dhe Emirateve.

Në rrjetin hetimor, emri i Ndreajt rezulton i lidhur edhe me të paktën dy kompani në fushën e shërbimeve dhe IT-së, të regjistruara në emra personash të tretë, për të cilët dyshohet se kanë shërbyer si mburojë ligjore për aktivitete të tjera financiare.

SPAK ka sinjalizuar se arrestimi i Ndreajt është vetëm maja e një strukture të organizuar që ka përdorur hijen e biznesit luksoz për të blerë influencë, pasuri dhe heshtje. Hetimet pritet të zgjerojnë rrethin e të dyshuarve, përfshirë emra të botës së ndërtimit, shërbimeve, por edhe media.

Nëse akuzat e SPAK provohen, rasti Ndreaj do të kthehet në një nga shembujt më të dukshëm të asaj që ndodh kur krimi organizohet me inteligjencë estetike dhe ndihmën e një shteti të pafuqishëm për të kuptuar dallimin mes luksit dhe larjes së parave./Pamfleti

IN Promo Marketing

Suksesi i radhës për ‘R & Rukolli Group’: Pijet e reja depërtojnë në tregun gjerman

Intel dhe Nvidia sjellin bashkëpunimin historik: Procesorë Intel me grafikë RTX të integruar

Shërbimi i Telefonave në Zone Mobile: Tani më Lehtë, Më Shpejt dhe Më Lirë!