Këngëtari i njohur amerikan dhe fitues i çmimeve Grammy, Lil Nas X, është arrestuar nga policia e Los Anxhelosit mëngjesin e së enjtes, pas një incidenti të pazakontë që ka ngjallur reagime në rrjetet sociale dhe mediat ndërkombëtare.

Sipas Policisë së Los Anxhelosit (LAPD), oficerët u thirrën në Ventura Boulevard, në zonën e Studio City, rreth orës 05:30 të mëngjesit (me orën lokale), pas raportimeve për një person që ecte në rrugë vetëm me të brendshme dhe çizme kauboji.

Pas mbërritjes së policisë, këngëtari, emri i vërtetë i të cilit është Montero Lamar Hill, thuhet se iu afrua në mënyrë agresive oficerëve, madje dyshohet se goditi njërin prej tyre, gjë që çoi në arrestimin e tij për sulm ndaj një zyrtari të rendit publik.

Pas ndalimit, ai u dërgua me urgjencë në spital për shkak të një dyshimi për mbidozë ose një gjendje shëndetësore të paqartë. Pas trajtimit mjekësor, këngëtari u lëshua nga spitali dhe u transferua në paraburgim, ku është zyrtarisht i akuzuar për vepër penale kundër një zyrtari të policisë.

Pamje të publikuara nga portali amerikan TMZ tregojnë reperin duke kërcyer në rrugë dhe duke thirrur kalimtarët me fjalët: “Ejani në festë!”

Lil Nas X pritej të publikonte albumin e tij të dytë “Dreamboy” brenda këtij viti, por nuk ka ende asnjë koment zyrtar nga përfaqësuesit e tij për incidentin.

Lil Nas X u bë i njohur në vitin 2019 me superhitin “Old Town Road”, që theu rekorde duke qëndruar 17 javë në krye të top-listës Billboard. Ai është gjithashtu artisti i parë hapur homoseksual që ka fituar një çmim të Shoqatës së Muzikës Country në SHBA.

I njohur për stilin e tij provokues dhe mesazhet e forta në videoklipet e tij, ai ka qenë shpesh në qendër të kritikave nga qarqe konservatore në Amerikë.

IN Promo Marketing

Suksesi i radhës për ‘R & Rukolli Group’: Pijet e reja depërtojnë në tregun gjerman

Intel dhe Nvidia sjellin bashkëpunimin historik: Procesorë Intel me grafikë RTX të integruar

Shërbimi i Telefonave në Zone Mobile: Tani më Lehtë, Më Shpejt dhe Më Lirë!