Kandidati i Lidhjes Demokratike të Kosovës për kryetar të Vushtrrisë, Xhafer Tahiri, ka zhvilluar të dielën një sërë aktivitetesh në kuadër të fushatës zgjedhore.
Ai e nisi ditën me homazhe pranë shtatores së kolonel Ahmet Krasniqit në Vushtrri, në 27-vjetorin e vrasjes së tij, ku u shoqërua nga familjarë dhe bashkëluftëtarë.
Më pas, Tahiri vizitoi disa lagje dhe fshatra të komunës, duke u takuar me banorë dhe përfaqësues të familjeve. Në Reznik, ai u ndal te familja Makiqi, ku bisedoi me qytetarët për çështjet e infrastrukturës dhe nevojat e tyre.
Një takim tjetër u zhvillua në Novolan, në familjen Vatovci, ku u diskutua për investimet dhe sfidat lokale. Ndërsa në Stanoc të Epërm, Tahiri u takua me familjen Shala dhe banorë të zonës, ku u fol për projektet e realizuara më herët dhe për problemet aktuale të komunitetit.
Sipas LDK-së, këto takime po shërbejnë si mundësi për të prezantuar programin dhe vizionin e kandidatit, por edhe për të dëgjuar drejtpërdrejt kërkesat e qytetarëve.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
