Zëvendësministri i Zhvillimit Ekonomik, Gani Koci, emri i të cilit ishte përfolur si ministër i ardhshëm i Drejtësisë, nuk ka dashur të komentojë lajmin se kolegu i tij partiak, Hajredin Kuçi, do të vazhdojë të mbajë pozitën e shefit të Drejtësisë megjithëse ai u emërua edhe si zëvendëskryeministër.

Insajderi ka kontaktuar përmes telefonit me Kocin, por ai nuk ka dashur që të komentojë lidhur me emërimet e reja në qeveri.

“Jam jashtë Kosovës,” ka qenë përgjigja e tij e shkurtë dhe nuk ka dashur të komentojë më tepër me gjithë insistimin e redaksisë.

Në një konferencë për media, Kadri Veseli, kryetar i Partisë Demokratike të Kosovës, dhe Isa Mustafa, kryetar i Lidhjes Demokratike të Kosovës, njoftuan sot se në pozitat e lëna bosh nga Hashim Thaci në Qeveri do të punojnë Hajredin Kuçi dhe Enver Hoxhaj.

Enver Hoxhaj u emëruar si Ministër i Jashtëm, ndërsa Kuçi si zëvendëskryeministër.

Por, mediat kanë raportuar javë më parë se Gani Koci pritet që të bëhet ministër i Drejtësisë kur Hajredin Kuçi të marrë detyrën e zëvendëskryeministrit./Insaderi.com