Kryetari i Bashkimit Demokratik për Integrim, Ali Ahmeti, në një postim në rrjetin e tij në Facebook ka thënë se pala serbe duhet t’i ndalojë provokimet menjëherë.
Ahmeti ka shkruar se është i shqetësuar për situatën e tensionuar në raportet mes Kosovës dhe Serbisë.
“Dënoj ashpër aktin e kidnapimit të policëve të Kosovës sot nga forcat speciale të Serbisë dhe pres lirimin e menjëhershëm të tyre. Pala serbe duhet ti ndalojë provokimet menjëherë dhe të dyja palët të ulen urgjentisht në tavolinën e bisedimeve dhe me ndërmjetësimin e aleatëve tanë, bashkësisë euro-amerikane, t’i japin fund kontestit shumëvjeçar përmes njohjes së ndërsjellë. Integriteti dhe sovraniteti territorial i Kosovës është i paprekshëm dhe i garantuar nga faktori ndërkombëtar”, ka thënë Ahmeti.
Ai ka thënë se tani është koha të ndërmerren veprime që të ruhet paqja, stabiliteti rajonal dhe perspektiva evropiane.