Për shkak se kryetari i trupit gjykues, gjykatësi Arben Hoti, ishte i angazhuar në një trajnim, është anuluar seanca e së mërkurës, në rastin ku ish-ministrja e Ministrisë së Integrimeve Evropiane (MIE), Dhurata Hoxha, ish-sekretari i kësaj ministrie, Demush Shasha, ish-sekretari Kushtrim Cukaj, si dhe Fitim Mustafa e Nuhi Osmani, po akuzohen për korrupsion.

Lajmi për anulimin e seancës, u bë i ditur nga gjykatësi Hoti, i cili tha se do të jetë në një trajnim nga ora 10:00.

Seanca e radhës, pritet të mbahet më 7 prill 2023, siç ishte e paraparë.

Ndryshe, të akuzuarit ishin deklaruar të pafajshëm në seancën e shqyrtimit fillestar, të mbajtur më 1 shtator 2021, shkruan Betimi për Drejtësi.

Sipas aktakuzës së ngritur më 7 korrik 2021, nga Prokuroria Speciale e Republikës së Kosovës, Dhurata Hoxha, Kushtrim Cukaj dhe Fitim Mustafa  po akuzohen se në vazhdimësi kanë kryer veprën penale “Keqpërdorimi i pozitës apo autoritetit zyrtar” nga neni 414, paragrafi 2 lidhur me nenin 77 paragrafi 1 të KPRK-së.

Kurse, Demush Shasha dhe Nuhi Osmani po akuzohen se kanë kryer veprën penale “Keqpërdorimi i pozitës apo autoritetit zyrtar’’ nga neni 414, paragrafi 2 të KPRK-së.

Shënim: Personat e përmendur në këtë artikull konsiderohen të pafajshëm, përveç nëse nga gjykata vërtetohet se janë fajtorë me vendim të formës së prerë.