Ministria e Punëve të Jashtme dhe Diasporës (MPJD) dhe Ministria e Punëve të Brendshme (MPB) kanë apeluar ndaj qytetarëve të Kosovës t’i evitojnë lëvizjet nëpër Serbi.

“Ministria e Punëve të Jashtme dhe Diasporës dhe Ministria e Punëve të Brendshme njoftojnë se pas situatës së krijuar në pikat kufitare në Serbi dhe ndaljes arbitrare të qytetarëve të Kosovës në vendkalime kufitare, të gjithë bashkatdhetarët dhe qytetarët që janë në lëvizje të evitojnë me çdo kusht kalimin nëpër Serbi”, thuhet në njoftim.

“MPJD dhe MPB janë duke ndermarrë veprimet e nevojshme dhe do t’iu mbajnë të informuar rreth detajeve të reja”, vijon njoftimi.

“Të gjithë udhëtarët luten që të ndjekin me vëmendje situatën e tensionuar të sigurisë dhe të mos udhëtojnë përmes Serbisë”.

Reagimi i tyre vjen pasi rreth 15 autobusa me targa të Kosovës janë bllokuar me orë të tëra në kufirin mes Kroacisë dhe Serbisë.

Një udhëtar ka treguar për Insajderin se policia kufitare ua ka marrë dokumentet dhe sipas tij ju kanë thënë se nuk mund të kalojnë deri të vjen urdhëri prej Beogradit.

“Na kanë marr dokumentet, edhe na kanë thonë me prit deri të vjen urdhëri prej Beogradit. Jemi diku 13-14 autobusa dhe 5 kerre me targa të Kosovës”, ka thënë ai. /Insajderi.org/