Deputeti i Lëvizjes Vetëvendosje, Adnan Rrustem ka deklaruar se është bërë kërkesa për lëshimin e urdhërarrestit ndërkombëtar për kryerësit e masakrës së Reçakut.
Ai ka thënë se është shumë e rëndësishme që sa më parë të nisë zbatimi i dispozitave që ndërlidhen me gjykimin në mungesë të tyre.
Rrustemi ka shtuar se asnjë qeveri e mëparshme nuk e ka trajtuar seriozisht këtë çështje.
Madje, sipas tij, përveç qeverive të kaluara edhe sistemi i drejtësisë dhe misionet e instaluara në Kosovë kanë pasur tendencë të amnistimit të krimeve.
‘’Megjithatë për herë të parë po shihen përpjekjet serioze për trajtimin e krimeve të luftës. Ky është një lajm që qytetarët dhe familjarët e të vrarëve e prisnin prej vitesh’’, ka shkruajtur ai në llogarin e tij në Facebook. /Insajderi