Pep Guardiola po e kërkon me ngulm transferimin e Bonucci-t nga Juventus në “Etihad” në afatin kalimtar veror, citojnë mediet angleze.

Trajneri aktual i Bayern Munich, kishte pranuar në ndeshjen e parë të Champions League-s me Juventus-in se Bonucci është “një nga lojtarët e mi të preferuar.”

Guardiola do të jetë trajner i Manchester City-t që nga sezoni i ardhshëm dhe thuhet se mbrojtja është reparti kryesor ku dëshiron përforcime spanjolli.

Çmimi i mbrojtësit konsiderohet të jetë 32 milionë euro. Bonucci mbush 29 vjeç në maj dhe ka qenë lojtari kyç i “Zonjës së Vjetër” këtë sezon.

Rëndësia e tij te klubi juventin është evidente, pasi ai ka luajtur në 40 ndeshje për skuadrën nga Torino këtë sezon duke zhvilluar 3,456 minuta në fushën e gjelbër, më shumë se çdo lojtarë tjetër.

The Mail raporton se Manchester City do të tentojë të nënshkruajë edhe me Paul Pogba-n, duke ofruar 108 milionë euro për dy lojtarët, edhe pse vetëm çmimi i francezit cilësohet të jetë 100 milionë.