Në fund të muajit që lam pas, më saktë me datë 30 korrik, Policia e Kosovës nën operacionin e emëruar “Shkoza”, goditi një grup të madh trafikantësh me emigrantë, të cilëve me vendim të Gjykatës Themelore iu shqiptua masa për një muaj në paraburgim, shkruan Insajderi.

Në mesin e grupit, madje kryesori prej tyre ishte, siriani Mohamed Alashban, i cili arriti të krijoj pasuri të majme në Kosovë, pa u vërejtur nga organet e rendit ishte marrë me biznesin e trafikimit të njerëzve e armëve deri me datën 14 korrik të këtij viti.

Cili ishte roli i sirianit te rrezikshëm në trafikimin me njerëz?

Insajderi raportoi se hetuesit që e kanë ndjekur sirianin, kishin gjetur pajisjet e tij elektronike që lidhen me trafikim të emigranteve, por edhe armë. Në këtë pajisje atij i janë gjetur video kërcënuese, ku shihen shumë armë e të cilat dyshohet se ua ka dërguar shtetasve të huaj të cilët kanë tentuar të hynë në “biznesin” e trafikimit me emigrantë në Kosovë.

Derisa, në vendimin e Gjykatës Themelore, u bë e ditur se roli i sirianit ishte që së bashku me pjesëtarët e tjerë të grupit “Shkoza” – shtetasit e huaj përmes hekurudhës t’i futnin ilegalisht në Serbi, me ç’rast përfitonin kundërligjshëm rreth 14,000,00 euro.

Ndryshe, Fillim Sinanaj i njohur me pseudonimin “Baba”, Lirim Sinanaj i njohur me pseudonimin “Lila”, Albrim Sinanaj, Besmir Arifaj, Eduard Arifaj, Labinot Ukaj, Shaban Muçaj, Urim Elezkurtaj, Besim Gavazaj, Alban Kerleshi, Bashkim Bunjaku, Enver Boletini, Fahredin Isufi, Admir Isufi e Labinot Zeqiri janë 16 personat e arrestuar nga Policia e Kosovës, ndaj të cilëve Gjykata themelore në Prishtinë ka marrë masa e paraburgimit prej një muaj.