Deputeti i Partisë Demokratike të Kosovës, Shukri Buja, ka thënë se trenin ilegal që tentoi të hyjë në territorin e Kosovës e ka ndalur kryeministri serb, Aleksandar Vuçiq. Në këtë mënyrë, ai e ka demantuar ish-liderin e tij partiak, Hashim Thaçin, i cili të mërkurën tha se ka qenë më meritori që treni nuk është futur në Kosovë.

“Trenin nuk e ndali as Amerika, por e ndali Vuçiqi,” ka thënë ai.

“Po ta kishte ndal Kosova, do ta ndalte në kufi. Vendosja e njësiteve speciale që gabimisht po quhen ROSU pasi nuk është më ashtu, njësitet speciale janë vendosur në kufi”, ka thënë ai në emisionin Rubikon, duke shtuar se megjithatë institucionet e Kosovës kanë ndikuar tek vendimi i kryeministrit serb.

Presidenti Hashim Thaçi të mërkurën ka thënë se po të mos ishte ai, treni ilegal i Serbisë do të futej në Kosovë.

I pyetur direkt nëse treni do të futej në Kosovë po të mos ishte ai, presidenti është përgjigjur prerazi.

“Po do të futej”, ka thënë Thaçi në emisionin “Komiteti”./Insajderi.com