Deputetja e Kuvendit të Kosovës, Besa Gaxherri, i është përgjigjur nënës së Astrit Deharit e cila në një emision televiziv i kishte kërkuar llogari Gaxherit, për deklaratat e saja në Kuvend.

Gaxherri i ka thënë nënës së Deharit se nuk ka pasur ndonjë qëllim personal me asnjërin prej të paraburgosurve të LVV-së.

“Shumë e nderuar zonja Dehari sot po e shfrytëzoj rastin që t’iu shpreh ngushëllimet si një nënë që kupton dhimbjen e një nëne. Unë nuk e kam njohur birin tuaj Astritin. Ai dhe 5 të akuzuar në të njejtën vepër nuk ua kam ditur asnjërit  emrin. Unë nuk kam asnjë qëllim personal me asnjë qytetarë të Kosovës”.

“Unë kam kërkuar nga Qeveria dhe qytetarët e Kosovës që të distancohen nga veprimet e tyre të dhunshme. Pse duhet gjetur në selitë e tyre, armë maska e molotov?. Kam thënë se Lëvizja Vetëvendosje duhet të jetë lëvizje demokratike. Ky ka qenë deklarimi im pas të cilit qëndroj edhe sot. Pa mëdyshje vdekja e një djali të ri në burgun e Prizrenit është e dhimbshme dhe tejet sfiduese për institucionet e vendi”, ka thënë ajo.

Gaxherri gjatë fjalimit e të saj në foltoren e Kuvendit po ashtu e ka akuzuar edhe avokatin e familjes Dehari, Tomë Gashi, për shtrembërim të fakteve.

“ Avokati Tomë Gashi në mënyrë të paskrupullt dhe skajshmërish të turpshme shtrembëron fakte”, deklaroi Gaxherri.