Sean “Diddy” Combs, 55 vjeç, përballet me dy padi të reja për sulme seksuale, duke rritur numrin e akuzave kundër tij ndërsa mbetet në burg në pritje të gjykimit penal.

Njëra nga paditë, ngritur nga një grua e identifikuar si Jane Doe, e akuzon për përdhunim gjatë një loje bamirësie basketbolli në vitin 1991, ndërsa tjetra vjen nga LaTroya Grayson, e cila pretendon se u drogua dhe u përdhunua në një nga festat e tij në vitin 2006.

Avokatët e Combs i kanë hedhur poshtë pretendimet, duke i quajtur ato “fiksion i pastër.” Në padinë e Grayson, ajo pohon se nuk mban mend ngjarjet e sakta, por ndjeu dhimbje dhe trauma pas festës. Ndërsa ‘Jane Doe’ pretendon se Combs e përdhunoi dhe më pas e kërcënoi, shkruan DailyMail.

Grayson kërkon 15 milionë dollarë (14 milionë euro) dëmshpërblim, ndërsa padia e saj përfshin dëshmi si biletat e avionit dhe të hotelit që i ishin dhënë për të ndjekur festën.

Grayson ishte 23 vjeç në kohën kur ajo pretendon se ka ndodhur sulmi

Combs, i cili më parë është përballur me akuza për trafik seksual dhe dhunë, mohon të gjitha akuzat dhe shpreh besim në procesin gjyqësor.

Akuzat e reja shtojnë presionin ndaj tij ndërsa problemet ligjore vazhdojnë të rriten.