Menaxherët e kontratës 12 milionëshe të Komunës së Prishtinës për “Shërbimi i Arkitektit të Kryeqytetit”, kanë dhënë dorëheqje. Nga Komuna e Prishtinës janë arsyetuar se të njëjtit janë larguar për shkak të mbingarkesës në punë. Për këtë kontratë, Prokuroria Speciale ka nisur hetimet. 

Ky tender është përcjell me parregullsi dhe ankesa që nga shpallja e njoftimit për kontratën. Pronari i kompanisë fituese Astrit Nixha, ka qenë bashkëpunëtor i afërt me Përparim Ramën, shkruan Insajderi.

Ndërsa tashmë ekipi menaxhues i i SHAK, ka dhënë dorëheqje nga menaxhimi i kësaj kontrate.

Tenderi 12 milionësh i Ramës për bashkëpunëtorin e tij, dorëhiqet ekipi menaxhues

Nga Komuna e Prishtinës në një përgjigje për Gazetën Insajderi, thanë se dorëheqja e tyre erdhi si pasojë e mbingarkesës në punë.

“Menaxheri dhe mbikëqyrësit e kontratës së Shërbimit të Arkitektit të Kryeqytetit kanë kërkuar të lirohen nga kjo përgjegjësi shtesë që kanë patur për shkak të mbingarkesës në punë. Dy prej tyre janë shefa të sektorëve me shumë përgjegjësi dhe detyra në sektorët ligjor dhe të planifikimit, pozita këto me ngarkesë të madhe. Për më tepër, Shërbimi i Arkitektit të Kryeqytetit ka të angazhuar dhjetëra arkitektë e staf dhe është duke punuar paralelisht në rreth 35 projekte që e ka bërë të pamundur për tre zyrtarët në fjalë të mbikëqyrin punën e këtij Shërbimi“, thuhet në përgjigjen e dhënë për Insajderin,

Tutje, thuhet se janë në proces të emërimeve të reja.

“Prandaj, ne jemi në proces të emërimeve të reja dhe të zgjerimit të ekipit menaxhues dhe mbikëqyrës të Shërbimit të Arkitektit nga tre në pesë zyrtarë. Posa të përfundojë procesi dhe të finalizohen emërimet do të ju informojmë për ekipin e ri menaxhues dhe mbikëqyrës të këtij Shërbimi“, thanë nga komuna.

Në njoftimin për dorëheqje të ekipit menaxhues thuhet se ky largim është i parevokueshme.

“Ju njoftojmë se me datë 04.06.2024, si ekip menaxhues i SHAK, kemi dhënë dorëheqje të parevokueshme nga menaxhimi i kësaj kontrate. Andaj për çdo informatë ju rekomandojmë t’i drejtoheni zyres se prokurimit për caktim të ekipit tjetër për menaxhim të kontratës apo çfarëdo informate tjetër rreth operatorit ekonomik“, thuhet aty.

Ndryshe Insajderi ka raportuar për dyshime konflikt interesi në këtë tender.

Dyshime të forta për konflikt interesi, ish-punëtori i Nixhës anëtar në komisionin në tenderin 12 milionësh të Përparim Ramës

Pasi anëtari i komisionit vlerësues, për këtë kontratë Kreshnik Ferizi, ka qenë i punësuar i Nixhës. Madje Nixha siç ka raportuar Insajderi në referencë të punës kishte dorëzuar një projekt me bashkëpunëtorë anëtarin e komisionit.

Dyshime për konflikt interesi në tenderin e Komunës së Prishtinës

Në korrik të vitit 2022, Komuna e Prishtinës kishte shpallur njoftimin për kontratën për themelimin e Shërbimit të Arkitektit të Kryeqytetit, në vlerë të parashikuar të kontratës prej 12 milionë euro, i cili ishte kategorizuar si aktivitet i prokurimit me dy faza.

Me 9 mars të 2023, Komuna e Prishtinës kishte publikuar rezultatet e pjesës teknike, ku ishin vlerësuar tre (3) operatorë ekonomikë me pikë, të cilët pastaj do të merrnin pjesë në hapjen e ofertave financiare që planifikohej të bëhej me datën 17 mars.

Pas shpalljes së fituesve ishin dorëzuar ankesa në Gjykatën e Tenderëve me pretendimin se ka pasur shkelje të Ligjit të Prokurimit Publik, konkretisht që operatorët ekonomikë të cilët janë vlerësuar me pikët maksimale në pjesën teknike kanë ofruar dokumente me “informata të rreme” me qëllim të përfitimit.

Tenderin 12 milionësh që Përparim Rama ia besoi SHAK është në pronësi të kompanisë së arkitektit Astrit Nixha, “ANARCH” SH.P.K. dhe kompanisë Ardi CC L.L.C.

Nixha, i cili e ka fituar këtë tender, ka qenë bashkëpunëtor i afërt me Përparim Ramën, para se ky i fundit të behej kryetar i Prishtinës.

Ndërsa tashmë janë ngritur dyshime se në këtë tender ka konflikt interesi.

Tenderi 12 milionësh i Ramës për bashkëpunëtorin e tij, Prokuroria Speciale nis hetimet

Komisioni i i vlerësimit është përbërë: Bekim Bajraktaraj, Njomza Blakaj, Alban Ymeri, Kreshnik Ferizi dhe Bekim Mustafa.

Kreshnik Ferizi, i përzgjedhur për anëtarë në komision ka lidhje me kompaninë fituese të tenderit.

Ferizi ka qenë punëtor i Astrit Nixhes ne Anarch dhe Nixha dhe Partners.

Madje, kompania “Anarch”, në këtë tender ka dorëzuar edhe referencat e punës që e lidhin me anëtarin e Komisionit vlerësues.

Kompania e Astrit Nixhës ka paraqitur Kreshnik Ferizin si bashkëpunëtorë në një projekt të tyre ““ZYRAT QENDRORE – ALBANIAN POST”.

Gazeta Insajderi ka dërguar pyetje edhe në Agjencinë kundër Korrupsionit për të parë se a ka elemente të konflikt interesit, por ata nuk kanë kthyer përgjigje.

Njëjtë ka vepruar edhe Kreshnik Ferizi që nuk është përgjigjur ndaj një kërkese për koment.

Tenderi i kurdisur 12 milionësh, miqtë arkitektë të Përparim Ramës i marrin milionat e parë

Mbi 3 milionë euro ka marrë kompania “ANARCH” e Astrit Nixhës dhe “ARDI Ç” nga Komuna e Prishtinës për 7 muaj në emër të “Konsulencës për themelimin e Shërbimin e Arkitektit të Kryeqytetit”, proces ky që shkaktoi shumë polemika brenda këtij institucioni.

Kiks Kosova ka arritur të sigurojë 6 fatura që konsorciumi “Shërbimi i Arkitektit të Kryeqytetit” ia faturoi Kuvendit Komunal të Prishtinës e të cilat janë të nënshkruara nga Astrit Nixha, si drejtor menaxhues i këtij shërbimi.

Pikërisht emri i këtij konsorciumi, që është i njëjtë me procesin e tenderimit, dhe ai i drejtorit menaxhues, Nixhës u bë shkak që të ngrihen polemikat dhe dyshimet që ky proces i prokurimit, i cili do t’i kushtojë Komunës së Prishtinës hiç më pak se 12 milionë euro, ishte i kurdisur.

Tri nga gjashtë faturat të cilat ShAK ia dërgoi Kuvendit Komunal të Prishtinës për pagesë, janë lëshuar me 12 mars të 2024-ës.

Të tria këto fatura, që kapin vlerën e rreth 900 mijë eurove, thuhet se janë obligime për një shërbim të vetëm, që sipas faturës është konsulencë për themelimin e “Shërbimit të Arkitektit të Kryeqytetit”.

Këto nuk janë pagesat e vetme që Komuna e Prishtinës i ka paguar kësaj kompanie, e cila parashihet të këshillojë komunën e Përparim Ramës për themelimin e “Shërbimit të Arkitektit të Kryeqytetit”.

Paraprakisht, rreth 2 milionë euro nga taksat e prishtinasve, Komuna e Prishtinës ia pagoi kësaj kompanie vitin e kaluar.

1 milion e 50 mijë euro iu paguan “Arkitektit të Kryeqytetit” në fundvitin e 2023-ës, derisa paraprakisht në nëntor të po atij viti, i ishin dhënë 577 mijë euro, kurse në një moment tjetër, rreth 400 mijë euro të tjera u derdhën në llogarinë bankare të këtij konsorciumi.

Astrit Nixha, i cili e ka fituar këtë tender, ka qenë bashkëpunëtor i afërt me Përparim Ramën, para se ky i fundit të behej kryetar i Prishtinës.

Gjurmët e këtij bashkëpunimi figurojnë ende në internet.

Ky nuk ishte projekti i vetëm që mban firmën e Nixhës dhe Ramës. Nga partner të biznesit në kushte të barabarta, bashkëpunimi i tyre kaloi në një nivel tjetër.

Në dokumentin tjetër, në të cilin ata vendosën firmat, Rama nënshkroi në cilësinë e kryetarit të Prishtinës, ndërsa Nixha si fitues i tenderit.

Kontrata për Themelimin e Shërbimit të Arkitektit të Kryeqytetit, në të cilin kompania “ANARCH” e ish-partnerit të Ramës dhe “ARDI- Ç”, u nënshkrua në qershorin e vitit 2023.

Dhe vetëm për tri vjet shërbim, ai do të shpërblehet me hiç më pak se 12 milionë euro.