Gjykata Themelore në Prishtinë ka aprovuar kërkesën e Prokurorisë duke ia caktuar masën e arrestit shtëpiak në kohëzgjatje prej 30 ditësh, Izedin Bytyqit, sekretarit të përgjithshëm në Ministrinë e Mjedisit, Planifikimit Hapësinor dhe Infrastrukturës, nën dyshimin për keqpërdorim të detyrës zyrtare dhe armëmbajtje pa leje.

Këtë e ka konfirmuar për media Mirlinda Gashi, zëdhënëse e Gjykatës Themelore në Prishtinë.

Izedin Bytyqit në shtëpinë e tij përgjatë operacionit policia në bashkëpunim me prokurorinë ia gjeti një revole me dy karikatorë. Po ashtu edhe dhjetëra fishekë.

“I arrestuari me inicialet I.B. dyshohet se ka kryer veprat penale: “Keqpërdorim i detyrës apo autoritetit zyrtar” dhe “Armëmbajtje pa leje”, kurse i dyshuari tjetër me inicialet N.F. dyshohet se ka kryer veprat: “Keqpërdorim i detyrës apo autoritetit zyrtar” “Shpëlarje e parave” dhe “Mosraportim apo raportim i rremë i pasurisë i të ardhurave, i dhuratave, i dobisë tjetër pasurore ose i detyrimeve financiare””, u tha në njoftimin e përbashkët të policisë dhe të prokurorisë.

Ai është dërguar në mbajtje për 48 orë, kurse “hetimet vazhdojnë për të identifikuar çdo person tjetër që mund të jetë i përfshirë në këtë aktivitet kriminal”.

Policia e Prokuroria kanë njoftuar se për këtë rast është lëshuar edhe urdhër përkohshëm i ndalimit për gjashtë banesa në Prishtinë dhe Fushë Kosovë, pa njoftuar se kush është pronari i tyre.

Insajderi raportoi gjatë ditës se krejt ky operacion është bërë në kuadër të dyshimeve lidhur me faljen e borxheve të kompanive për ambalazhimin e ujit.

Në kërkim është edhe Naser Hafizi, drejtor i Autoritetit Rajonal të Pellgjeve Lumore në Ministrinë e Infrastrukturës për “keqpërdorim të detyrës apo autoritetit zyrtar”, “shpëlarje e parave” dhe “mosraportim apo raportim të rremë të pasurisë”.