Nënkryetari i Kuvendit të Kosovës, Xhavit Haliti, ka bërë të ditur se policët serbë të cilët janë pjesë e Policisë së Kosovës dhe që veprojnë në veri të Mitrovicës, marrin paga edhe nga shteti i Serbisë.

Sipas Halitit, ata përveçse marrin paga të dyfishta, kanë edhe uniformat shtesë të policisë së Serbisë të cilat i mbajnë nëpër shtëpitë e tyre.

Këto komente nënkryetari i kuvendit i ka bërë gjatë takimit me delegacionin e Lëvizjes Evropiane Daneze të cilët e vizituan Kuvendin e Kosovës.

Duke iu përgjigjur pyetjeve të anëtarëve të Lëvizjes Evropiane Daneze në lidhje me shtrirjen e sovranitetit dhe ndikimin e institucioneve të Kosovës në veri të vendit, Haliti e ka pranuar se Kosova nuk e kontrollon atë pjesë të vendit. Sipas tij, ndryshimi i kufijve është i pamundur, sepse, bashkësia ndërkombëtare ia njeh Kosovës kufijtë e vitit 1974, duke shtuar se ndryshimin e tyre e ndalon edhe Kushtetuta., shkruan zëri.info.

Ai ka folur edhe për anëtarësimin e Kosovës në Këshillin e Evropës, duke kërkuar nga delegacion i Lëvizjes Evropiane Daneze që ta ndihmojë Kosovën në këtë rrugë.

Ndërkaq, në fund Hailti e ka njoftuar këtë delegacion edhe me zhvillimin e jetës parlamentare në Kosovë.

Ai ka bërë të ditur se pas një periudhe të gjatë dhe skenave jo të mira që kanë ndodhur nga partitë opozitare në kundërshtimet e tyre për marrëveshjen e Demarkacionit me Malin e Zi si dhe asaj të Asociacionit, tanimë Parlamenti i Kosovës i është kthyer normaliteti dhe të gjitha subjektet politike në Kuvend janë duke bashkëpunuar dhe punuar normalisht.