Kampioni evropian nga viti 1988 dhe njëheri ndër kombëtaret favorite për ngadhënjimin në kompeticionin “Euro 2020”, Holanda, ka mposhtur Maqedoninë e Veriut me rezultat 3-0, duke bërë këta të fundit të përshëndeten nga gara pa asnjë pikë, shkruan Insporti.
Në minutat e para të ndeshjes, Ivan Trickovski e futi topin në rrjetë, por goli u anulua për pozitë jashtë loje. Më vonë, një goditje e fuqishme e Aleksandar Trajkovskit u ndal në shtyllën e portës kundërshtare.
Nuk zgjati shumë dhe rezultati u zhbllokua. Golin e vetëm në fraksionin e parë e shënoi Memphis Depay (24’), pas asistimit nga Donyell Malen.
Georginio Wijnaldum e dyfishoi epërsinë në gjysmën e dytë (51’) nga afërsia, pas një asistimi të Depay.
Edhe goli i tretë i Tulipanëve erdhi nga dyshja e përmendur. Portieri Stole Dimitrievski mbrojti goditjen e Memphis, por aty ishte Wijnaldum për ta futur topin në rrjetë (58’).
Ndryshe, Maqedonia e Veriut këtë edicion u kualifikua për herë të parë në një Kampionat Evropian.