Sot në Hong Kong u zhvillua protesta e përvitshme nga banorë dhe aktivistë që kundërshtojnë sovranitetin kinez mbi këtë qytet. Protesta u organizua në 20 vjetorin e kalimit të Hong Kongut nga qeverisja britanike nën sovranitetin e Kinës. Nën temperaturat e larta, mijëra vetë marshuan duke filluar nga qendra e qytetit. Protestuesit hidhnin parulla kundër udhëheqjes kineze dhe asaj të Hong Kongut.

Po sot udhëheqësja e re e Hong Kongut, Carrie Lam bëri betimin para Presidentit të Kinës Xi Jinping. Flamujt e Kinës dhe Hong Kongut u ngritën me rastin e inaugurimit të shefes së re ekzekutive, në ceremoninë e zhvilluar pranë Portit Victoria, ku në 1997 guvernatori britanik i dorëzoi zyrtarisht Kinës autoritetin mbi qytetin e Hong Kongut.

Zonja Lam mori detyrën sot për t’i shërbyer Kinës dhe Hong Kongut në rolin e saj si shefe ekzekutive. Ajo u zgjodh në post nga më pak se 1% e votuesve të regjistruar në Hong Kong, në një proces që u kritikua ashpër nga aktivistët si i padrejtë.

Përgatitjet për ceremoninë e sotme janë shoqëruar me masa të forta sigurie.

Britania ia riktheu Kinës Hong Kongun më 1 korrik, 1997, nën formulën “një vend, dy sisteme” që do t’u lejonte banorëve të këtij qyteti të drejta shumë më të gjera se qytetarëve të tjerë kinezë.