Deputeti i Partisë Demokratike të Kosovës, i ka thënë kryeministrit Albin Kurti, të niset për në Ushington, Londër, Paris, Bruksel.

Kjo sepse sipas tij, vetëm kështu kalohet situata e krijuar në veri të Kosovës.

“Situata në veri te vendit është në pikën më të ulët të politikës në Kosovë në 20 vitet e fundit dhe sigurisë dhe fillimi më i vështirë që ka pas Kosova në 20 vitet e fundit… Nuk është vetëm vakum, është humnerë politike, ku komunat e Kosovës janë pa kryetarë, ku stacionet e policisë janë pa policë, ku gjykatat janë pa gjykatës”, tha Hoxhaj, shkruan Gazeta Insajderi.

“Data e 5 nëntorit është ora më e keqe e historisë moderne të Kosovës, çka kemi ndërtuar nga viti 2008 është shemb me 5 nëntor”.

Hoxhaj këto deklarata i ka bërë pas rezolutës së paraqitur nga Aleanca për Ardhmërinë e Kosovës, e cila parasheh katër pika:

1. Qeveria e Republikës së Kosovës të marrë vendim menjëherë për shtyrje të vendimit për targa deri në marrëveshje finale.

2. Institucionet e Kosovës: Presidenca, Kuvendi, Qeveria e Republikës së Kosovës, institucionet në të gjitha nivelet, të fillojnë dialogun intensiv me serbët e Kosovës për t’u kthyer në insitucionet e Kosovës dhe për të kthyer besimin e ndërsjellë.

3. Qeveria të nisë komunikim intensiv me faktorët më relevantë në vend, duke përfshirë edhe opozitën, jo vetëm si reflektim i gjendjes së krijuar por edhe si nevojë e gjetjes së rrugëdaljes nga situata e krijuar.

4. Të kërkohet një Samit në Shtetet e Bashkuara të Amerikës (takim disaditor), deri në përmbylljen e marrëveshjes finale për njohje Kosovë-Serbi.

Kundër këtyre pikave ka dalë Lëvizja Vetëvendosje.

Kështu ka deklaruar Armend Muja, deputeti i Albin Kurtit në Kuvend.

“Ne nuk do ta mbështesim rezolutën e prezentuar nga Alenaca për Ardhmërinë e Kosovës”, ka thënë Muja para deputetëve, shkruan Gazeta Insajderi.