Njëri nga të arrestuarit për krijimin e një laboratori të drogës në kryeqytet e që u shkatërrua nga Policia e Kosovë po del që ka edhe një biznes aktiv. Hasan Xhemajli është aksionar i një kompanie të pijeve me emrin “BED Group”. Sipas të dhënave në ARBK, del që pronar i kompanisë është Bedri Avdullahu ndërsa aksionar është i arrestuari për laboratorin e drogës, Hasan Xhemajli i njohur si “Viktor Bajçinca”.

Policia e Kosovës të dielën njoftoi për shkatërrimin e laboratorit të drogës në kryeqytet. Aty prodhoheshin substanca narkotike të llojit kokainë dhe heroinë.

Sipas ARBK’së kompania me emrin “BED Group”, është regjisturar në vitin 2017 dhe vazhdon të jetë aktive.

Sipas ARBK’së kjo kompani merret me tregti të pijeve.

Insajderi ka arritur të sigurojë dosjen që dëshmon se si të dyshuarit po kryenin punët për përpunimeve e dy llojeve të substancave narkotike.

Si funksiononte grupi që përpunonte kokainën dhe heroinën?

Siç kupton Insajderi, të arrestuarit për këtë rast janë: Hasan Xhemajli dhe Kadri Gashi.

Xhemajli dhe Gashi dyshohet se në bashkëkryerje kishin një objekt në afërsi të Fakultetit Teknik në Prishtinë të mbyllur me dru ku kishin mjetet e përpunimit të laboratorit të drogës.

“…Kanë  hapur  derën e hyrjes e cila  ishte  e  mbyllur  me  dry, nga aty kanë filluar t’i nxjerrin  mjetet  e punës, pajisjet  te  cilat  kanë  shërbyer  për  procedura  të  punës  në  Laboratorin e  drogës, ku fillimisht është vërejtur   nga  aty  ata  kanë  nxjerrë  një  elektromotor apo Mikser  të  madh  të  cilin  e kane  futur  ne  automjetin  Volksvagen Caddy, ngjyrë hiri e me pastaj  kanë e vazhduar që nga lokali/ Laboratori  të  nxjerrin  edhe  pajisje  tjera  si  Boce  e madhe  gazi  si  dhe  pako  me  materie  te  dyshuar, ne  këtë  moment  kane  ndërhyrë  hetuesit  e SQHN-DHTN , duke i  kapur  ne  flagrance  të pandehurit  Hasan  Xhemajli  dhe Kadri  Gashi”, thuhet në dosjen e Prokurorisë.

Të dyshuarit në bashkëkryerje dyshohet se kanë kryer veprën penale “Prodhimi dhe përpunimi i paautorizuar i narkotikëve, substancave psikotrope, analoge apo veglave, pajisjeve apo materialeve narkotike”.

Prokuroria Themelore në Prishtinë ka kërkuar caktimin e masës së paraburgimit ndaj dy të dyshuarve. /Insajderi.org/