Partia e politikanit serb, Aleksander Jabllanoviq ka reaguar pas incidentit në veri të Kosovës ku mbeti i plagosur një qytetar.

Në komunikatën e partisë thuhet se “Sulmi i paprovokuar i pjesëtarëve të SHPK-së mbi një serb pranë postbllokut policor në lumin Bistrica dhe mbulimi fillestar nga policët e pranishëm minon shumë besueshmërinë edhe ashtu të vogël të njësisë speciale të SHPK-së”.

Sipas tyre, ky sulm është dëshmi se në njësinë speciale ka nga ata që nuk e shohin punën e punonjësit të policisë si punë njerëzore dhe të përgjegjshme.

Më tej theksohet se partia e dënon sulmin dhe përpjekjen për ta mbuluar atë. Mes tjerash thonë se kërkojnë që institucionet ndërkombëtare si KFOR dhe EULEX të përfshihen në hetim.

“Ne e dënojmë fuqishëm këtë sulm dhe përpjekjen për ta mbuluar atë. Kërkojmë që institucionet ndërkombëtare (KFOR-i dhe EULEX-i) të përfshihen në hetimin e mëtutjeshëm për të vërtetuar në mënyrë të paanshme të gjitha rrethanat e këtij sulmi dhe tentim vrasjes së një shtetasi të nacionalitetit serb”, thuhet në komunikatë.