Anëtari i Partisë së Lirisë, Norbert Hofer, i cili njihet për qëndrime kundër Kosovës, ka thënë të hënën se Kosova është pjesë integrale e Republikës së Serbisë.

Hofer që ishte afër të bëhej president i Austrisë, ka thënë se veprimet e njëanshme sa i përket statusit të Kosovës komplikojnë pajtimin dhe dialogun.

Këto komente ai ka bërë në një intervistë për gazetën serbe Kurir.

“Sipas të drejtës ndërkombëtare , Kosova është një pjesë integrale e Republikës së Serbisë. Veprimet e njëanshme, sa i përket statusit të krahinës serbe, e komplikojnë procesin e pajtimit dhe dialogun e vërtetë. Rrjedhimisht, ato pengojnë një jetë të qetë dhe të begatë për të gjithë qytetarët në Kosovë”, ka thënë Hofer.

Ai gjithashtu ka folur edhe për marrëveshjen e Dejtonit që sipas tij konfirmon legjitimitetin dhe ligjshmërinë e ekzistencës së Republikës së serbe.

Hofer ishte  kandidat për President  të Austrisë në zgjedhjet e 2016 . Ai mori një shumicë të votave në raundin e parë dhe humbi në balotazh me Alexander Van der Bellen më 22 maj.