Kryetari i Partisë së Serbëve të Kosovës, Aleksandar Jabllanoviq, ka deklaruar se hyrja e kryetarit të ri të Leposaviqit, Lulzim Hetemit, me dhunë ngjalli reagimin e protestuesve serbë.

Jabllanoviq këtë e ka deklaruar në një intervistë për Gazetën Insajderi, teksa e ka fajësuar kryeministrin e Kosovës, Albin Kurtin, për, siç tha ai, shkaktim të një konflikti që s’po i shihet fundi.

“Mendoj se ai është thjesht një instrument shpenzues i politikës shoviniste të Vetëvendosjes dhe Albin Kurtit. Lulzim Hetemi dhe VV nuk arritën t’i rikthejnë institucionet e Kosovës në veri, por përkundrazi shkaktuan konflikte dhe tensione, fundi i të cilave nuk po shihet dhe rrezikon të jetë parathënie e një konflikti më të gjatë e më të madh me pasoja të paparashikueshme”, deklaroi ai.

Sipas Jabllanoviq, për t’u qetësuar situa në veri, së pari duhet të largohen Njësia Speciale e Policisë së Kosovës nga veriu dhe puna e kryetarëve të rinj të bëhet jashtë objekteve komunale. Jabllanoviq ka lavdëruar kryetarët e sapozgjedhur të veriut nga radhët e PDK-së, të cilët nuk kanë dale në objekte komunale përgjatë ditës së sotme.

“Lëvizja e kryetarit të PDK-së është dëshmi se ka edhe një anë të arsyes tek politikanët shqiptarë, dhe është dëshmi edhe sot se, përveç të gjitha partive të tjera në Kosovë, PDK është e atyre partive që në mënyrë pragmatike dhe racionale mbrojnë vullnetin e votuesit e tyre dhe interesat e shumicës së qytetarëve.  Vendimi i tyre duhet të jetë shembull dhe mesazh për Lulzim Hetemin se mënyra që ai zgjodhi në marrëveshje me shefin e tij Albin Kurti është thellësisht e gabuar, e dëmshme për serbët dhe shqiptarët, e dëmshme për Kosovën dhe shkatërron reputacionin e një institucioni siç është Policia e Kosovës, e cila deri më 26.05 për mendimin tim ajo kishte autoritet të madh edhe te serbët”, deklaroi ai.

Gazeta Insajderi: Si e përshkruani situatën në Leposaviq?

Jabllanoviq: Gjendja në Leposaviq është e jashtëzakonshme, pothuajse e paraluftës. Në shumë lokacione, Policia e Kosovës është e pranishme, me staf krejtësisht etnik me shqiptarë. KFOR ka shtuar praninë e tyre. Lëvizjet e Policisë dhe KFOR-it ngjallin nervozizëm shtesë dhe rreziku i konfliktit është rritur. Serbët në Leposaviq nuk e perceptojnë KFOR-in si armiqësor, por nuk mund të thuhet e njëjta gjë për Policinë e Kosovës. Ngjarjet e datës 26 maj dhe dhuna e policisë ndaj qytetarëve, si dhe hedhja e shok-bombave në oborret e disa shkollave dëmtuan rëndë reputacionin dhe besimin e qytetarëve tek policia. Fatkeqësisht, nuk do të jetë e mundur të rifitohet besimi as lehtë, as shpejt.

Gazeta Insajderi: Ka pasur raportime se kryetari I ri i Leposaviqit qëndron ende i mbyllur brenda objektit komunal. A rrezikohet jeta e tij, duke e pasur parasysh situatën?

Jabllanoviq: Nuk ka absolutisht asnjë rrezik për kryetarin e ri, nëse ai do të ndryshonte sjelljen e tij dhe në përputhje me autoritetin të cilin e ka, ose më mirë të themi nuk e ka në Leposaviq, do të ndalonte lëvizjet provokuese, do të mund të kryente punën e tij pa pengesa nga një vend tjetër. Z. Hetemi besoj se është plotësisht i vetëdijshëm se veprimet e tij dhe hyrja e dhunshme në objekt nuk mund të kalonin pa përgjigje nga opinioni dhe qytetarët dhe, nëse nuk është në dijeni të këtij fakti, atëherë është problem edhe më i madh. Ai hyn dhe del nga ajo ndërtesë si “vampir” gjithmonë pas errësirës dhe në atë ritual rrezikon jetën e qytetarëve, policëve dhe pjesëtarëve të KFOR-it. Mendoj se ai është thjesht një instrument shpenzues i politikës shoviniste të Vetëvendosjes dhe Albin Kurtit. Lulzim Hetemi dhe VV nuk arritën t’i rikthejnë institucionet e Kosovës në veri, por përkundrazi shkaktuan konflikte dhe tensione, fundi i të cilave nuk po shihet dhe rrezikon të jetë parathënie e një konflikti më të gjatë e më të madh me pasoja të paparashikueshme.

Gazeta Insajderi: Cila mendoni se është zgjidhja? Çfarë duhet bërë për të zbutur situatën në veri në përgjithësi, veçanërisht në Leposaviq?

Jabllanoviq: Së pari mendoj se duhet tërhequr urgjentisht Njësia Speciale nga veriu, e cila ka më shumë se 7 muaj që qëndron pa arsye dhe gjatë gjithë kësaj kohe po ndodhin vetëm incidente, lëvizje të qytetarëve. po ngadalësohet dhe situata sa më e komplikuar për qytetarët dhe policinë. Kryetarët e rinj duhet të pranojnë se nuk është e mundur të ushtrohet pushteti ashtu siç e kanë parashikuar, sepse në politikë mund të kenë sukses vetëm ata që qëndrojnë pas kompromiseve, jo forcave speciale. Babai im ishte kryetar i komunës së Leposaviqit dhe i pari në sistemin e Kosovës nga viti 2013-17. Por, për arsye të natyrës politike dhe të sigurisë, ai e ka ushtruar pushtetin që nga viti 2015 nga ambiente që nuk janë në objektin e komunës. Në atë kohë mund të kishim kërkuar shërbimet e policisë apo të KFOR-it, pasi kishim mbështetjen e mbi 3000 votave të marra në zgjedhje, por nuk e bëmë këtë sepse do të shkaktonte revoltë tek qytetarët që e shohin atë ndërtesë. Ky është një shembull i qartë se pushteti mund të ushtrohet nga çdo vend nëse ke autoritet politik dhe përgjegjësi ndaj komunitetit lokal. Shpresoj që problemet të njihen dhe të jetë e qartë se këta kryetarë komunalë nuk janë gjë tjetër veçse një zgjidhje afatshkurtër dhe e përkohshme. Z. Hetemi dhe mentori i tij Albin Kurti duhet të veprojnë në përputhje me rrethanat. Lëvizja e kryetarit të PDK-së është dëshmi se ka edhe një anë të arsyes tek politikanët shqiptarë, dhe është dëshmi edhe sot se, përveç të gjitha partive të tjera në Kosovë, PDK është e atyre partive që në mënyrë pragmatike dhe racionale mbrojnë vullnetin e votuesit e tyre dhe interesat e shumicës së qytetarëve.  Vendimi i tyre duhet të jetë shembull dhe mesazh për Lulzim Hetemin se mënyra që ai zgjodhi në marrëveshje me shefin e tij Albin Kurti është thellësisht e gabuar, e dëmshme për serbët dhe shqiptarët, e dëmshme për Kosovën dhe shkatërron reputacionin e një institucioni siç është Policia e Kosovës, e cila deri më 26.05 për mendimin tim ajo kishte autoritet të madh edhe te serbët. /Insajderi.org/